Home مياه عزبه كاستينج الميكرو و اللايت جيج من البدايه للنهايه

الميكرو و اللايت جيج من البدايه للنهايه

1
0
115

الميكرو و اللايت جيج من البدايه للنهايه:-

كاتب الموضوع / ‎Ahmed Khadary 

-موضوع شيق جدا و غير منتشر في مصر بدرجه كبيره مع انه مناسب جدا سواء للبحر الاحمر او البحر المتوسط او حتي لأسماك المياه العذبة الموجودة بالنيل و بحيره ناصر
-الميكروجيج من اسمه هوا جيج لكن اصغر في الحجم و الوزن و كان الهدف منه في الاساس محاكاه الغذاء الطبيعي للأسماك متوسطة الحجم لان طبعا الاسماك في بيئتها الطبيعية بتتغذي علي اسماك اصغر و اللي طولها بيكون من ٤-٧ سم تقريباImage may contain: outdoor and water

-الميكرو جيج عاده بيتم تصنيعه من الرصاص او من ماده التنجستين Tungsten و هيا ماده اثقل من الرصاص بحوالي 1.7مره لكن لندره هذه المادة فاسعرها غالي جدا لدرجه ان اسعار الميكروجيج المصنوع من التنجستين تقريبا ثلاث او اربع اضعاف سعر المصنوع منها من الرصاص لذلك من الافضل استخدام الرصاص لتوفره و رخص ثمنه لكن في حالات بيكون من الضروري استخدام الميكرو جيج التانجستين او بيكون لابديل عنها و هنتكلم عن الحالات دي لاحقا
في شركات كثيره جدا بتنتج و بتشتغل مايكرو و لايت جيجً من اشهرهم على سبيل المثال لا الحصر :-
Shimano-Daiwa-Damiky-Jigpara-Ima-Shout-Maria-Storm Gomoku-SAME-Lure Factory-Savage Gear-Swage-Hearty Rise- Yakuza -Blue Blue -Abu Garcia-Poseidon-zerek-Pelagic Warrior-Hayabusa-Opass-Duo-Eco Gear-oishi anglers
-الميكرو جيج اوزانه عاده بتبتدي من 2او3 جرام الي 50 جرام
و اللايت جيج من 50 الي 100 -120 جرام

Image may contain: outdoor and water
و الميكرو جيج تطبيقاته كتير جدا لذلك بيستهدف جميع الاسماك و ستفاجئ بانواع الاسماك الممسوكه بالمايكرو سواء كانت اسماك القاع او الاسماك السطحيه او الموجوده بين المايتين و طبعا الموضوع ده بيعتمد علي طريقه الصيد بيه سواء كانت كاستينج كانك بتستعمل رابلا او جيرك بيت عادي بطريقه افقيه او جيجينج راسي و بيعتمد ايضا علي سرعتك في تحريك الميكرو جيج في المايه و تكنيك الحركه نفسه (الصور المرفقه لصيدى لانواع مختلفه على المايكرو و اللايت جيج)
-من امتع المميزات اللي هتحس بيها في المايكرو جيجينج ان العده المستخدمه خفيفه جدا و مش هتسبب اي ارهاق او تعب حتي لو بتشتغل طول اليوم بيها و كذلك اكشن السمكه بيبقي اكثر من ممتع علي عده خفيفه و خصوصا لو كان حجم السمكه كبير نسبيا وهنا بتظهر مهاره الصياد انه يطلع سمكه حجمها كبير بالنسبه للعده و الخيوط المستخدمه

بالنسبه للقصبات في قصبات مخصصه للميكرو و اللايت جيج و اغلبها بيكون مصنوع من ال Solid Carbon لضمان اعلي مستوي من الحساسيه مع اقل سماكه ووزن ممكن لكن مش من الضروري انك تستعمل القصبات دي لان اي قصبه كاستينج خفيفه هتقضي الغرض
طبعا مع مراعاه الاوزان المكتوبه عالقصبه في حال انك بتستخدمها في حدف الميكرو جيج من الشاطئ( Shore jigging ) او اذا كنت بتعمل كاستينج للميكرو جيج من علي مركب .

و في معلومه مهمه جدا مفروض تاخد بالك منها وهيا ان الكاست ويت cast weight لاي بوصه غير ال jig weight بتاعها بمعني ان لو عندك بوصه كاست مكتوب عليها cast weight 7-28 g و انتا عاوز تشتغل بيها ميكرو جيج فانتا ممكن تحط ميكرو جيج وزنه 30 او 40 جرام و تشتغل بيه عادي طالما مش هتحدف الميكرو ( كاست ) و هتشتغل بيه جيجينج راسي فقط vertical jigging ، و العكس صحيح يعني لو عندك بوصه مايكرو جيج مكتوب عليها max jig weight 70 g مينفعش تحدف بيها جيج 60 او 70 جرام لانك ممكن تكسر البوصه انما ممكن تحدف بيها ميكروجيج وزنه 15 او 20 جرام بالكتير
بالنسبه للشور جيجينج في قصبات مخصصه للموضوع ده و بتختلف عن قصبات الكاست في طول المسكه تحت الماكينه لامكانيه وضعها تحت الذراع اثناء عمليه الصيد و كذلك بتكون اطول نسبيا مع وزن خفيف جدا Shore jigging rod و من اشهرها عالميا شركه اسمها Palms و القصبه اسمها Shore gun Evolv
https://youtu.be/CrZwUmyqwHQ
https://youtu.be/M8jxfMBnm-M
https://youtu.be/ajZEkvavU1k
https://youtu.be/PKny2TGTuVk
-اما بالنسبة للماكينات فاي ماكينة للكاست هتؤدي الغرض و اللي عاده بيكون احجامها من 1500-4000
بالنسبه للخيوط :–
-لازم تراعى انك بتتعامل مع اوزان خفيفه جدا ولازم الوسيط بين حركه الجيج و القصبه ينقل كل الاكشن بطريقه سريعه و واضحه ولذلك افضل شيء هوا خيوط البريد لانها لاتمدد وبالتالى بتنقل كل اللى بيحصل تحت المياه للقصبه بالسرعه و الوضوح الكافى و من انسب المقاسات لشغل المايكرو جيج من اول8lb الى 25lb و بالنسبه لليدر الافضل استخدام فلوروكاربون ليدر نظرا لاستحاله رؤيته في المياه , و مقاسه عاده بيكون اكبر من مقاس البريد الاساسي بحوالى من 5-10 lb نظرا لانه اول شيء يمتص الصدم من السمكه في الصيد ,
-اما طول الليدر فعلى حسب طريقه الاستخدام مثلا لو هتستخدم المايكرو جيج بطريقه الكاست فراعى ان يكون طول الليدر من 40 الى 60 او 70 سم و السبب في ذلك انك تمنع الوصله بين البريد و الليدر انها تدخل داخل اول حلقه في القصبه و بالتالى احتكاكها بالحلقه بيقلل قوه الحدفه و المسافه و مع الوقت بيحصل تاكل لها و تلاقى ان الوصله اتقطعت مره واحده بسبب الاحكتكاك و ايضا لانك مش محتاج ان طول الليدر الغير مرئي يبقى كبير لان في حاله الكاست السمكة بتجرى ورا المايكرو جيج و من الصعب جدا انها تشوف الخيط الاساسي,
-اما في حاله الجيجينج الراسي فا بيكون طول الليدر مره او مرتين طول القصبه او من 2-44 متر وده بيعطيك مجال اكبر لاخفاء الخيط الاساسي (البريد)
الوصله بين خيط البريد و بين الفلوروكاربون من المهم انها تكون صغيره و قويه في نفس الوقت و من المهم جدا انك تتمرن عليها و تتقنها بالسرعه و الجوده الكافيه و من اشهر الربطات :-

FG Knot = https://youtu.be/quWszScIxgw
Improved Albright Knot = https://youtu.be/Hp5XWarpu8g
Double Uni-Knot = https://youtu.be/oa4uh36uuiw

و طبعا اسهلهم هيا ال Double Uni-Knot و اقواهم و افضلهم هي ال FG Knot

-اختيار الجيجات و اوزانها موضوع سهل جدا و بيعتمد في الاساس على العمق اللى هتشتغل عليه ونوع الاسماك الموجودة بالمكان و كذلك قوه التيارات المائية
و بعض المحترفين بتشتغل بمعادله معينه في اللايت جيج و هوا ان :
لكل 1 فيت = 1 جرام
بمعنى انك لو العمق بتاعك 40 فيت هتستعمل جيج 40 جرام وطبعا المتر تقريبا = 3 فيت بمعنى ان 400فيت = 12 متر
لكن المعادله دى مش قانون بمعنى ان في عوامل تانيه بتتدخل في المعادلة زى قوه التيارات المائيه لكن الهدف منها انها تقربك لانسب اوزان ممكن تستخدمها حسب العمق.
وطبعا تغيير الوزن و اللون و شكل المايكرو جيج و تكنيك او طريقه الجيجينج امر يرجع للصياد و التجربه و الخبره
-طبعا في بعض الاحيان بتقابل مشكله لما بيكون العمق كبير و الاسماك المستهدفه حجمها متوسط نسبيا و كل لما يزيد وزن الجيج حجمه بيكبر و بالتالى الاسماك هجومها عليه بيقل لكبر حجمه ,لو حصل الموقف ده فا مفيش حل الا الجيجات التنجستين لان وزنها بيكون كبير جدا بالنسبه لحجمها يعنى تقريبا ممكن تلاقي لايت جيج تنجستين وزنه 80 جرام و حجمه نفس حجم المايكرو جيج ال 40 او 30 جرام و المصنوع من الرصاص,
والجيجات التنجستين عاده بيتكتب جنبها TG كرمز
اخر شيء في منظومه الميكرو هوا طريقه وصل الليدر بالمايكرو نفسه و في كذا طريقه و مفيش قانون و كل حاجه لها مميزات و عيوب
الميكرو جيج عاده بيتباع معاه الاسيست هوك موصول فيه سواء كان ثنائي او فردى لكن بعض الشركات بتتركلك الحريه في تركيب الاسيست المناسب لك على حسب استخدامك و راحتك
بالنسبه للجيج الجاهز بيكون مزود باسبليت رينج فا كل اللى بتعمله انك بتربط الليدر في سوليد رينج حجمه مناسب و بتوصله بالاسبليت رينج الموجود في الميكرو جيج
و لو موجود سوليد رينج بين خيط الاسيست و الاسبليت رينج ممكن تربط فيه الليدر علطول و ممكن تستبدل السوليد رينج بمشبك و ده بديك حريه تغيير المايكرو جيج بسرعه اكبرو كذلك سباحه المايكرو جيج بتكون افضل لكن من المهم استخدام نوع مشبك جيد و مخصص للكاست او الميكرو واللايت جيج
بالنسبه للجيج اللى يباع بدون اسيست هوك فا ممكن تفتح المشبك الموصول بالليدر و تركب اسيست هوك سواء انتا عامله او شاريه منفصل جاهز و تركب الميكرو جيج يعنى يكون المشبك هوا الرابط بين الميكروجيج و الاسيست هوك من جهه و الليدر من جهه اخرى و دى افضل طريقه بستخدمها لان الاسيست هوك في الحاله دى بيكون ثابت و لو حبيت تغير فا بتغير المايكرو جيج فقط
المشبك زى ما له مميزات له عيوب و من اخطرها انه لو نوعه سيء و قوه تحمله ضعيفة فا انتا معرض انك تخسر لو سمكه قويه ضربت عليك و المشبك فتح تحت قوه الشد !!!!

– التريبل هوك(triple hook) او الهوك الثلاثى :
بعض انواع الميكرو جيج بيكون مزود بتريبل هوك لضمان فرص صيد اكبر لكن نصحيه لو انك غير متاكد من القاع اللى بتشتغل عليه لازم تستبعد الهوك ثلاثى لان فرص تعلقه بالقاع كبيره جدا و احتمال فقدانك للمايكروجيج هيكون كبير
و عموما اقتراب المايكرو من القاع الصخرى خطر سواء كان فيه تريبل هوك او لا و افضل طريقه لتجنب الموضوع هوا معرفه العمق و وقت سقوط الجيج (وقت سقوط نفس الجيج في نفس المكان بيختلف من وقت لاخر حسب التيارات المائيه )
و طريقه معرفه وقت سقوط الجيج هوا ازاله جميع الهوكات و بدء العد بانتظام من لحظه السقوط الحر للجيج في المياه لحين الاستقرار على القاع و اعاده تركيب الهوكات و التكرار و بدء السحب قبل اكتمال العدد

-كيفيه اختيار المايكرو جيج :
احرص على التنوع في اشكال و الوان المايكرو جيج بمعنى اصح ميكونش عندك عدد كبير من ميكرو جيج نفس النوع او الشكل لان كل شكل له طريقه سقوط معينه في المايه و في حين فشلت في الصيد بنوع او شكل معين لازم تغير الشكل و المقاس بالتالى تغير اسلوب السقوط و كذلك تغير طريقه حركته لاظهاره بشكل جديد للسمكه ومن افضل اساليب الصيد هو محاكاه شكل الطعم الطبيعى الموجود بالمكان بغض النظر عن اللون (الصور المرفقه مجموعتى الخاصه من المايكرو و اللايت جيج )

-تصنيع المايكرو جيج يدويا :-
طبعا المايكرو جيج من اسهل الطعوم الصناعيه في التصنيع و من الممكن صنعها يدويا في البيت باستخدام رصاص الصيد العادى واللينك المرفق يبين المحترف Andy من استراليا و طريقه صنعه للمايكرو جيج و اللينك الاخر لاختباره و الصيد بيه
https://youtu.be/ocfZPnlRiyY
https://youtu.be/Ej-3MdPxWWM
بالنهايه سامحونى عالاطاله و بالتوفيق لكم جميعا

Load More Related Articles
Load More By admin
  • سمكة المياس

    بسم الله الرحمن الرحيم صيد سمكة المياس للكاتب Mohamed Waheed المياس سمكة قوية جداً واللي ي…
  • كاستينج المياه العذبه

    السلام عليكم نقلا عن / Abdou Anssary Shahpo للمهتمين بالكاستنج فى المياة العاذبة كنت حابب …
Load More In كاستينج

One Comment

  1. Ahmed Eltrabulsi

    أبريل 13, 2017 at 2:08 م

    معلومات مهمة ورائعة وشرح اروع.

    Reply

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Check Also

يخت كوين نور بالغردقة

طول ٢٠ متر عرض ٥ و نص  عدد ٢ غرفه – غرفه ٤ سرير و غرفه ٢ سرير الصالون مكيف  جي بي اس…