Home مياه مالحه Slow Jigging part 2

Slow Jigging part 2

0
0
776

السلو جيجينج slow jigging خطوه بخطوه (2)
بقلم الدكتور / Amir El-Sewefi
:::::::::::::::::::::::::::::::::::::::::::::::::::::
اليوم اللقاء الثانى بيننا فى الحديث عن تقنية ومنظومة ال slow jigging السلو جيجينج… ولمن فاته الجزء الأول فليدخل هنا .

زى ما أتعودنا دائما حا نحاول تبسيط الأمر قدر الأمكان والبعد تماما عن أى تفاصيل علمية والفاظ معقدة .. فى اللقاء الماضى أتكلمنا عن منظومة السلو جيجينج وقلنا أنها بتتكون من أربع عناصر مهمة ورتبناهم بالشكل الآتى: الخيط والماكينة والعود والجيجاية وقلنا أن هما دول الأربع أعمدة الأساسية اللى بيتبنى عليهم تقنية الجيجينج بشكل عام وتقنيات كتيرة أخرى فى الصيد ..

النهاردة حا نقتل عنصرين منهم بحثا اللى بأعتبرهم أهم عنصرين فى أى منظومة صيد وهما: الماكينة والعود.

لضمان الأستمرارية فى السرد ولربط اللقاءات ببعضها حا نستعير دائما أجزاء ومقالات من اللقاءات السابقة ونكمل عليها بتفاصيل أكثر وأضافة وشرح أدق وبكده يبقى عندنا نوع من الأستمرارية الفكرية وما نفقدش التسلسل ويظهر الموضوع بشكل أوضح وأفضل.

يلا بينا نبداء بعيدان السلو جيجينج:
فى اللقاء الماضى قلنا أن عود السلو جيجينج أرفع بكتير وأطول من العود العادى وده لأنك محتاج وسيط حساس علشان ينقل الحركة اللى انت بتعملها بمنتهى الامانة للجيجاية لأن مساحة حركة الجيجاية فى تقنية السلو مساحة مش كبيرة ..

لو مجازا مشوار الحركة 80 سم والجيجاية على عمق 90 متر ممكن بسهولة نتيجة عدم أختيار المنظومة بشكل جدا وعدم توافقها يخلينا نفقد من 10 ل 15 سم من الحركة اللى تمت فوق المية لحد ما توصل الحركة للجيجاية تحت الميه بسبب سمك الخيط الزائد وسرعة التيار .. ال 10أو ال 15 سم اللى فقدناهم بيمثلوا من 12 ل 18% من أجمالى مشوار الحركة وديه نسبه كبيرة جدا ممكن تحول الجيجاية امام السمكة من طعم مغرى حى لقطعة حديد فاقدة الحياة.

أمر آخر مهم جدا فى العود السلو وهو سرعة الأرتداد .. عود السلو رفيع وطويل وبالبلدى رقع .. مش ناشف .. وده بيخليه ينحنى أو ينثنى بسهولة مع أى حركة بنعملها لتحريك الجيجاية بمعنى أنك لو لفيت ذراع الماكينة بسرعه علشان ترفع الجيجاية مع ثبات العود موازى لسطح الماء اللى حا يحصل أن العود حا ينثنى لأسفل وهو اللى حا يمتص حركة لف يد الماكينة وبعد كده حا يبداء العود فى الأرتداد بسرعة فا حا ينطر الجيجاية لأعلى وهنا بيبدا الشغل كله ..

خد بالك أحنا هنا ما أتكلمناش عن تحريك العود وأنما لف يد الماكينة .. فى السلو جيجينج الأعتماد فى تحريك الجيجاية حا يكون على لف يد الماكينة وبالتالى حا ينحنى العود لأسفل لأنه رقع وبعدين حا يرتد لأعلى وينطر الجيجاية فا تتحرك الجيجاية الحركة اللى المنظومة كلها أتصممت عليها واللى بتخليها مقنعة للسمكة.

فى السلو جيجينج زى ما قلنا قبل كده ما تحاولش تحمل السمك على العود .. خللى العود دايما واخد زوية لأسفل مش لأعلى .. خلى تعاملك عن طريق الماكينة والدراج الخاص بيها .. فى السلو جيجينج العود مش مهمته تحميل السمك أكتر من تحريك الجيجاية.

ماشى .. نختار بقى العود أزاى ؟ وأيه كيفية جعله متوافق مع المنظومة؟
بشكل مجمل فيه تقنيتين فى الجيجينج .. واحدة سريعة والتانية بطيئة .. كل واحدة من التقنيتين تحتها أكثر من أسلوب للممارسة .. تحت تقنية السلو جيجينج ممكن نقول بشكل عام أن فيه 3 أساليب شهيرة:

الأول أسمه سلو بيتش جيجينج slow pitch jigging
هنا الحركة بتتم عن طريق تحريك يد الماكينة مع ثبات العود موازى لسطح الماء .. بنلف يد الماكينة بسرعة .. بينثنى العود لأنه بيمتص حركة لف يد الماكينة .. بيرتد العود بعد الأنثناء .. بينطر الجيجاية لأعلى .. بتتحرك الجيجاية لأعلى المسافة اللى أرتد فيها العود وبتحاكى فى حركتها شكل السمك الطعم .. بتتوقف الجيجاية حتى تحريك يد الماكينة مرة أخرى وده ظاهر لحضراتكم فى الفيديو التالى:
https://www.youtube.com/watch?v=LyT7q5We0ZY

الثانى أسمه لونج فول سلو جيجينج long fall slow jigging
هنا سيب الماكينة فى حالها .. أمسك العود وخليه لأسفل قدر الأمكان .. أرفع العود مرة واحدة لأعلى نقطة ممكنة .. بعد ما رفعت العود حا يكون أمامك حلين .. أما أنك تنزله مرة واحدة فا حا تسقط الجيجاية لأسفل حره أو تنزل العود ببطء وده حا يخللى الجيجاية تنزل ببطء وتظهر بشكل مخالف للشكل اللى سقطت بيه لما سيبناها تسقط حرة !! .. مضبوط ؟ .. هايل ..

طب ما كده فى أمر جديد ظهر !! .. طب أيه اللى يمنع بدل ما أرفع العود بسرعة مرة واحدة أنى أرفعه مرة بسرعة ومرة ببطء وأعمل نوع من التباديل والتوافيق فى الحركة ؟! .. بمعنى مرة أرفعه لأعلى بسرعة وأسيبه يسقط بسرعه ومرة أرفعة بسرعة وأنزله ببطء ومرة أرفعه ببطء وأنزله بسرعة ومرة أرفعه ببطء وأنزله ببطء !! .. أيه الجمال ده !! ..

يعنى لحد دلوقتى خليت الجيجاية بأقل مجهود تعمل أربع حركات مختلفة على نفس العمق لأنى زى ما قلنا ما حركتش يد الماكينة وكل ده بأيد واحدة بدون أرهاق وتعب ! .. خلاص ؟ .. لأ لسه .. طيب ما تيجوا ندخل الماكينة معانا .. أنزل بالجيجاية لحد ما توصل للقاع .. لم بسرعة متر أو متر ونص علشان تبعد عن التوعير .. أثبت على العمق ده وأبد أعمل الاربع حركات اللى لسة متكلمين عليهم وجرب وشوف فين من الحركات الأربعة ممكن تكون فعالة وتضرب بيها سمك ..

جرب كده 5 أو 6 مرات .. لو ما ضربش معاك حاجة لف أيد الماكينة لفة وأرفع لجيجاية لأعلى شوية فى عامود الميه .. لو فرضنا فى اللفة ديه أنت طلعت 80 سم لفوق .. عيد تانى على العمق الجديد ده الأربع حركات وكررهم زى ما قلنا 5 أو 6 مرات ضرب معاك سمكة خير وبركة .. ما ضربش لف أيد الماكينة لفة كمان بيقى للمرة التانية غيرت العمق وعيد تانى نفس الحركات وأفضل جرب لحد ما يضرب معاك سمك وده حا يظهر لحضراتكم فى الفيديو التالى:
https://www.youtube.com/watch?v=6rJjaeJWF5w

ونلتقي مع الجزء الثالث بإذن الله
———————-
Amir El-Sewefi

Load More Related Articles
Load More By admin
Load More In مياه مالحه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Check Also

كل ماتريد معرفته عن قصبات الصيد (Fishing Rod)

كل ماتريد معرفته عن قصبات الصيد (Fishing Rod):  قصبة الصيد التي نستعملها ويسميها البعض الع…