Home مياه مالحه (slow Jigging part (1) (vedio

(slow Jigging part (1) (vedio

0
0
815

السلو جيجينج slow jigging خطوه بخطوه
بقلم الدكتور / Amir El-Sewefi
::::::::::::::::::::::::::::::::::::::::::::::::
السلو جيجينج .. (سلو) و (جيجينج) أو الجيجينج البطئ .. كلنا عرفنا ومارسنا الجيجينج العادى وشعرنا بجمال ومتعة الاحساس بضربة السمكة والسعادة اللى بنحس بيها بعد الصراع الطويل معاها وأننا نشوفها على المركب فى النهاية ..
الحركة فى الجبجينج العادى بتكون سريعة وقوية .. تكرارات كتيرة بوتيرة ثابتة .. نفس تون (tone) الحركة بيتكرر طول الوقت تقريبا.. العدة وزنها بيكون ما بين 1100 جرام و1400 جرام .. ده الوزن المتوسط وأحيانا ممكن يكون أكتر بشوية .. أنا هنا بأتكلم على الجيجينج العادى مش اللايت جيجينج (light jigging) اللى حا يجيله وقته أن شاء الله ..
فى أثناء الجيجيج العادى بتكون الحركة شبه ثابتة .. تكرارات سريعة وقوية زى ما قلنا لوزن فى المتوسط كيلو وربع تقريبا بنفس الوتيرة.. الأمر ده بعد فترة بيسبب أجهاد لعضلات اليد والكتف والظهر ..
لازم نعترف أن فيه متعه خاصة جدا بنحسها أثناء الجيجينج السريع وهى ضربة السمكة أثناء تحريك اليد لأعلى بسرعة وبقوة .. بترفع أيدك لفوق بقوة وفى نفس اللحظة السمكة بتشدك لأسفل وبقوة أكثر عشرات المرات من القوة اللى أنت بترفع بيها المنظومة اللى فى أيدك ..
أحساس رائع وكل ما بتكون حركتك لأعلى أقوى وأسرع والسمكة بتشد فى نفس اللحظة فى أتجاه معاكس لحركتك وبمنتهى القوة كل ما شعورك بالمتعة بيزيد .. كل مازادت القوة كل مازاد الأدرينالين فى دمك وارتفع سقف التحدى وزاد الترقب .. بيطول زمن الصراع بيك والقلق أنها تروح منك حا يحطم أعصابك وما أجمل أنك فى النهاية تسمع المركب كله بيصرخ لأنها أصبحت أمامك .
للأسف فيه أمر بيحصل ممكن يعكر صفو السعادة ديه كلها ومتعة الأستمرار فيها اللى هو التعب وألم العضلات والأرهاق الشديد اللى حا تحس بيه واللى ممكن يمنعك من الأستمرار أطول وقت ممكن .. السبب ببساطة فى الشعور بالألم فى العضلات هو أنه بيتراكم داخلها الأنسجة حمض أسمه حمض اللاكتيك ..
أستحملونى دقائق حا تتكلم فى امر طبى مهم أننا نعرفه ..
أثناء الجهد الشديد الجسم بيستخدم الأكسيجين عادة لأنتاج الطاقة لكن لما الجهد بيزيد على الجسم بيضطر الجسد إلى أستخدام طرق غير هوائية لأنتاج الطاقة اللى أنت بتحتاجها أثناء الجيجينج السريع .. الجسم ممكن يستمر من 3 الى 5 دقائق فى التعامل مع الطرق الجديدة لأنتاج الطاقة لكن خلال هذه الفترة نسبة حمض اللاكتيك بتزيد تدريجيا فى العضلات لحد ما بتوصل لمرحلة بتتسبب فى أبطاء حركة العضله وده مع الشعور بالآلم والتعب تحذير لجسدك أنك اقتربت من الحد الاقصى لقدراتك لحمايتك من الأصابة.
ركزوا معايا .. موضوع أبطاء الحركة ممكن ما تاخدش بالك منه .. اللى حواليك حا يلاقوك بدأت تتحرك شوية أبطاء من اول ما بدأت .. أبطاء الحركة فى الجيجينج العادى مش لصالحك لأن المنظومة اللى فى أيدك والتصميك الأيرودايناميكى للجيجات السريعة لا يعمل بكفائة الا مع السرعة العالية .. رغبتك فى الصيد بتخليك تستمر بس حاليا انت تعبان ومش واخد بالك أن سرعتك بدأت تبطاء وبدأت تفقد التوافق العضلى العصبى فا بالتالى الجيجات مش قادرة تحقق اللى هى أتصممت علشانه وبالتالى وقت ضايع وتعب مستمر وأحساس سخيف بالأحباط لأنك بتتعب ومش بتصطاد ! ..
بتتوقف قليلا للراحة ونبداء فى النهجان أو التنفس السريع وده رد فعل بيلجاء ليه الجسم بعد المجهود والتعب علشان يضخ أكسيجين زيادة للجسد .. من مهام الاكسيجين أنه يخلصك من تراكم حمض أللاكتيك وبالتالى بينتهى الشعور بالتعب وتقدر تواصل تانى الحركة ..
أمر أخر بتعمله من غير ما بتاخد بالك أول ما بتبدا تشعر بالتعب وبتحب تحرك الجيجاية أسرع أنك بتكتم نفسك علشان تاخد عزم .. كتم النفس هنا علشان أعطاء الجسد قوة اكتر لكن فى نفس الوقت بتعمل كارثة لأنك بتمنع عن جسدك الأكسيجين اللى أنت اصلا محتاجه علشان يتخلص جسمك من حمض الاكتيك اللى بيحسسك بالتعب يعنى بدون ما بتقصد بدل ما بتساعد نفسك بتتعبها.
حمض الاكتيك من الاحماض اللى بتدوب فى الميه .. عايز ما تتعبش وتزود فترة أستمتاعك بألجيجينج السريع أشرب ميه كتير جدا قبل ما تبداء وبعد البداية وكل 20 دقيقة اشرب شوية ده حا يساعد أنك تقلل فترت التعب.
موضوع الصله بين حمض أللاكتيك والتعب وأن الأكسيجين بيخلصنا منه موضوع مهم جدا جدا.. عارفين ليه ؟ لأن الحمض ده مش بيتكون فى داخل الجسم البشرى بس !! ..
لأ .. وكمان السمكة .. بيتكون بداخلها أثناء الصراع معاها وبيسبب التعب ليها.. الصراع بينك وبين الاسماك العملاقة هو فى الواقع مش صراع قوة لكن صراع تحمل .. مين حا يتحمل نسب هذا الحامض فى جسده أكتر من التانى .. لو أثناء الصراع عرفت أزاى تتعامل معاها بحيث أنك تثبت طول الوقت مقدار الشد بينك وبينها وتمنعها بقدر الأمكان من الحركة علشان تقلل نسبة الأكسيجين اللى بيدخل لجسدها حا يرتفع مستوى الحمض داخل عضلاتها بسرعة شديدة وبالتالى حركتها حا تقل والعضلات حا تتقلص وحا تقدر تسيطر عليها وده معناه أنك ممكن تتعامل مع اسماك أكبر حجما من قدرة العدة اللى معاك !! . .
أن شاء الله فى لقاء قادم حا نشرح هذا الأمر بمنتهى الوضوح وحا نعرف أفضل طريقة لأنزال السمكة للماء مرة تانية catch & release وسر تحريك السمكة فى الميه قبل ما نسيبها وأن الهدف منه مش بس السمكة تستعيد قدرتها على النتفس مرة أخرى ولكن كمان بنساعدها انها تتخلص من زيادة نسب الحامض فى عضلاتها فا تقدر تتحرك وتعوم.
نرجع تانى لموضوع الجيجينج .. فى الجيجبنج العادى الحركة السريعة والتصميم الأيرودايناميكى للجيجاية بيدوها شكل مقنع جدا للسمكة بأنها تهاجمها .. كل ماكانت الجيجاية مصممة بشكل جيد ومدروس هندسيا كل ما قل المجهود اللي بيعمله الصياد علشان يحقق بيها أفضل النتائج لأن كل زاوية ومنحنى فيها بيخلوها تعمل حركات تحاكى حركة السمك الطعم وده اللى بيزود أقبال السمك عليها.
Load More Related Articles
Load More By admin
Load More In مياه مالحه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Check Also

كل ماتريد معرفته عن قصبات الصيد (Fishing Rod)

كل ماتريد معرفته عن قصبات الصيد (Fishing Rod):  قصبة الصيد التي نستعملها ويسميها البعض الع…